اردو زبان اپنے حسنِ بیان، لطافتِ اسلوب اور معنوی گہرائی کے اعتبار سے دنیا کی سب سے دلکش زبانوں میں شمار ہوتی ہے۔ اس زبان کے فکری اور تہذیبی خزانوں میں محاورات اور کہاوتیں نہایت اہم مقام رکھتی ہیں۔ یہ محاورات اور کہاوتیں اردو کے طرزِ ادا، اس کی نرمی، شگفتگی، طنز و مزاح، عقل و حکمت اور زندگی کے تجربات کی عکاسی کرتی ہیں۔ محاورہ اور کہاوت محض زبان کے زیور نہیں بلکہ قوم کے ذہنی، اخلاقی اور سماجی شعور کا آئینہ بھی ہیں۔ ان کے ذریعے نہ صرف الفاظ کو جان ملتی ہے بلکہ گفتگو میں دلکشی اور اثر آفرینی پیدا ہوتی ہے۔ محاورہ دراصل عربی لفظ ’’حور‘‘ سے بنا ہے جس کے معنی ’’گفتگو‘‘ یا ’’بول چال‘‘ کے ہیں۔ محاورہ اس طرزِ بیان کو کہتے ہیں جو کسی زبان کے اہلِ زبان کے درمیان عام طور پر رائج ہو جائے اور جس کے معنی لغوی نہیں بلکہ مجازی یا علامتی ہوں۔ محاورہ وہ مخصوص طرزِ ادا ہے جو ایک قوم کے طویل تجربے، مشاہدے اور روزمرہ زندگی سے پیدا ہوتا ہے۔ اردو محاورات کی سب سے بڑی خوبی یہ ہے کہ یہ عام بول چال سے وجود میں آئے ہیں، یعنی ان میں زندگی کی عملی اور سماجی حقیقتیں سمائی ہوئی ہیں۔ مثال کے طور پر ’’آنکھ کا تارا‘‘ محبت اور شفقت کا استعارہ ہے، ’’منہ کی کھانا‘‘ ناکامی کو ظاہر کرتا ہے، ’’آسمان سر پر اٹھانا‘‘ شور و ہنگامہ مچانے کو ظاہر کرتا ہے۔ یہ سب محاورے اپنے اندر گہری معنویت رکھتے ہیں جو ایک لفظ سے ممکن نہیں ہوتی۔ کہاوت اس سے کچھ مختلف مگر ہم معنی صنف ہے۔ کہاوت دراصل تجربات، مشاہدات اور اجتماعی دانش کا نچوڑ ہے جو عام طور پر ایک جملے کی صورت میں زبان زدِ عام ہو جاتی ہے۔ کہاوت میں اخلاقی تعلیم، نصیحت یا کسی خاص حقیقت کی طرف اشارہ ہوتا ہے۔ کہاوتوں میں قوم کی صدیوں پرانی روایات، عقائد، رسم و رواج اور ذہنی میلانات محفوظ ہوتے ہیں۔ مثلاً ’’جیسا کرو گے ویسا بھرو گے‘‘ عدل و انصاف اور مکافاتِ عمل کی طرف اشارہ کرتی ہے۔ ’’اونٹ کے منہ میں زیرہ‘‘ قلت اور بے قدری کو ظاہر کرتی ہے۔ ’’نیکی